潮語「邪釘」又邪又釘咁，真係好有靈異色彩。「邪」字本身都唔慌係好嘢，邪魔、邪惡、邪靈、邪念、撞邪……總之都唔係正路。「釘」就令人諗起死亡，因為港式粵語有所謂「釘蓋」，係死咁解。同時，「釘」亦令人諗起釘子，通常嗰啲法科師傅或道士作法驅邪驅鬼嘅時候，都會用到「釘」嚟消滅啲類似殭屍嘅邪靈，所以「邪釘」亦畀人一種同超自然力量有關嘅感覺。查實「邪釘」呢個潮語係指一啲嘢相當邪門，形容一件事好「邪釘」，即係話呢件事可能同一啲靈界事物有關，又或者奇怪嘅程度不能以人類科學可以解釋得到。

又到農曆七月嘅盂蘭節，亦即香港人俗稱嘅鬼節。相傳一到農曆七月，鬼門關就會打開，地府一眾孤魂野鬼就會到陽間「個人遊」。每年到咗呢個時候，好多人都會上街燒街衣，以祭亡魂求個心安理得。不過，查實唔使等到鬼節，香港都已經近人鬼不分。尤其係最近政局混亂，一班膠官庸官、一班唯阿爺是從嘅反智建制派政客，加埋一幫以維穩費維生，收錢搞社運嘅政治流氓，香港社會今時今日已經係人鬼難分。盂蘭時節當啲鬼還陽飄到返嚟，見到香港搞成咁，見到嗰啲「反佔中」分子，見到「張融」班人啲面口，都可能會頂唔順，連鬼都驚，分分鐘仲慶幸自己死得早，一早移民地府，走得快好世界！講開又講，今年歲次適逢甲午，真係認真「邪釘」，除咗上幾星期連續幾單空難之外，台灣又有大爆炸，影響範圍達方圓兩公里，莫非甲午真係會出大事？

但係「邪釘」本身出處係同法術靈界無關，「邪釘」係嚟自「斜釘」，係一種用天九骨牌玩嘅古老賭博遊戲，玩法類似接龍，喺清朝已經相當流行。後來，傳吓傳吓，「斜釘」就誤講為「邪釘」，借個「邪」字嚟形容邪門事。神又好，人又好，鬼又好，面對中央不斷屈機打壓，香港已經無路可逃。香港人就只有自求多福，希望唔好有咁多「邪釘」嘅事降臨香江。

第一手消息請下載on.cc東網iPhone/iPad/Android/Windows Phone Apps