政壇：搞搞政：鄧家彪升呢 自稱窮爆收租佬

阿Bill早前更新佢嘅申報資料，將自己喺新界區擁有嘅物業，刪除咗「自住」兩個字，點解呢？佢解釋，自己有個位於新達廣場嘅五百呎單位，去年底發現地板滲水谷起，為免整親佢囡囡，一家三口惟有被迫暫時租住同區另一單位，騰空原來住宅大裝修。點知佢一住，就「貪新忘舊」，皆因新屋足足有成九百呎，大過舊單位八成。雖然新屋冇咁近港鐵站，但地方大咗，密度又低啲，最後就索性將舊單位放租，最近已成功租出，由於涉及金錢利益，咪拿拿聲更新資料囉。

新屋租貴一闊三大

我哋恭喜佢升呢做收租佬，阿Bill就自謙，自己係一個「窮爆」嘅收租佬，一來層舊樓仲要供足二十年，二來間新屋大過舊屋咁多，每月單計租金要畀多四千幾銀，而且一闊三大，新屋乜嘢開支都多好多，估計要捱到個女出身搵嘢做，先可以再諗買過層大啲嘅樓。新屋大咗咁多，諗唔諗住追多個呀？Bill笑言未有打算住，暫時將新屋多咗間房當書房用喎。