政壇：見證立會亂象實習生開眼界
立法會秘書處早前舉辦第二屆「專上學生2014年度實習計劃」，一共有十九名學士同副學士學生參加。喺為期三至四周嘅實習期內，同學們除咗被派往秘書處各部門，體驗秘書處日常工作外，仲有機會參與立法會大小會議，同各黨派議員面對面交流。今年六、七月正值立法會「多事之秋」，拉布、流會、掟嘢、暴力衝擊同集體衝出座位等議會亂象沒完沒了，一眾實習生真係大開眼界。
陳維安（右一）再次帶班實習生入會議廳參觀。
同學響鐘未遇流會
我哋尋日約咗立法會秘書長陳維安同其中十位立會實習生傾偈，就讀恒生管理學院嘅Jason喺議會事務部（3）實習，有機會親身進入會議廳，見證議員開會嘅眾生相，包括負責喺議員要求響鐘時，幫手「剔名」點算法定人數。Jason話有啲議員喺響鐘期間都不斷行出行入，搞到佢數極都數唔清楚，幸好喺佢「任內」都未試過因法定人數不足而流會，算係好腳頭。
來自教育學院嘅Fiona就喺翻譯部工作，負責將議員發言翻譯做英文文本，撞啱激進泛民發動多線拉布戰，令佢同其他翻譯組同事有大把發言翻譯，忙到無停手。Fiona話班拉布議員嘅發言大部分都言之有物，令佢識多咗唔少社會議題，返工一啲都唔覺得悶。陳維安就話，初時都有擔心實習生難以喺短時間內融入秘書處生活，又驚會加重其他同事負擔，好在今屆實習生遠比佢想像中活潑同熱情，來年佢會考慮延長實習期同畀啲同學仔喺更多部門做嘢，等佢哋有更多得着。
