政壇：政府校對員爭劃一工時得個吉

公務員事務局日前向立法會一個委員會回信，話收到校對職系下「校對」職級員工嘅要求，希望同「高級校對」與「總校對」兩個上司職級嘅工時睇齊，由現時每周工作四十五個鐘，減到每周四十四個鐘。

雖然只係少一個鐘，但當局都詳加解釋，話校對員工嘅工時要同印刷工場職員配合，為免影響印刷工作效率，印刷工場員工嘅工時冇得改，拖累校對員工都要每周做足四十五個鐘。

政府落實標準工時進度馬虎，外界一直唔抱期望，但有趣嘅係，喺呢個高度電腦化嘅年代，究竟政府仲請緊幾多全職公務員專用人手校對呢？我哋尋日詢問政府依家成個校對職系仲有幾多員工，政府就話一時間答唔到我哋喎。