政壇：莫乃光驚死收廿蚊書仔申報

多個泛民政團同人士獲秘密捐款後唔申報，搞到立法會議員個人利益監察委員會都要速速做嘢，不過，其他議員就變晒「驚弓之鳥」，拿拿臨向立法會補鑊申報過往涉嫌漏報嘅捐款同其他個人利益，有部分議員更係「唔怕一萬、至怕萬一」，有理冇理、乜嘢雞毛蒜皮都報咗先，譬如資訊科技界嘅莫乃光（Charles），就申報喺今年四月立法會出訪上海時，收咗港澳辦主任王光亞贈送嘅一本《基本法》，價值二十二元人民幣。其他同樣有獲王光亞送《基本法》嘅議員，就未見主動申報，Charles咪變相搞到其他議員涉嫌漏報？

民主黨單仲偕就申報喺七月八至十日，獲「腓特烈．瑙曼基金會」邀請出訪雅加達，出席亞洲自由民主議會會議，由對方提供機票住宿。至於紡織及製衣界鍾國斌（Felix），申報喺今年六月二十日開始，做恒寶企業控股有限公司嘅非執董。本身係基督徒嘅獨立泛民議員黃毓民，就申報喺今年五月二十六日，獲「國際釋迦文化中心」贊助一萬三千二百元搞長者活動。