政壇：辭任滙豐恒生職務 張建東「裸退」休養
前行政會議成員張建東（Marvin）尋日一次過辭任滙豐銀行同恒生銀行嘅董事職務，佢早前已突然辭任機場管理局主席一職，依家喺政商界接近「裸退」，圈中傳言，連串隱退消息，應該同佢個人健康有關，揼低咁多職務後，希望Marvin好好休養吓，他日「東」山復出喇！
張建東近期先後辭任機管局主席及恒生、滙豐銀行董事等職務，在政商界接近「裸退」。（資料圖片）
滙豐銀行尋日發出通知，指張建東已辭去獨立非執董及集團監察委員會成員職務。同系嘅恒生銀行亦喺同日宣布，張建東已辭任獨立非執董職務，兩者都係即時生效。Marvin加盟恒生董事會已有十年，之後仲做埋審核委員會委員同風險委員會主席，地位吃重，恒生尋日就喺通告中感謝佢嘅英明指導，祝願佢往後事事順利。滙豐集團主席范智廉亦發通告，對○九年起擔任滙豐非執董嘅Marvin辭任深感惋惜。
06年曾患急性血癌
講番佢早前辭任機管局主席，政府宣布接任安排好奇特，先由原機管局董事羅康瑞暫代主席一年，之後再同現任貿易發展局主席蘇澤光互換職位，當時有傳言係同Marvin與羅康瑞就機場北用地發展用途爆發爭拗有關。至於Marvin嘅身體，據資料，佢○六年曾患上急性血癌，去年又傳佢接受過髖關節置換手術，之後要篤住拐杖行路。
