政壇：慢必單打政改 寸阿人「袋住先」
多名立法會議員收受壹傳媒主席黎智英獻金嘅事愈揭愈醜，袋咗錢嘅幾位立法會議員被迫解畫，但表現藏頭露尾，工黨主席李卓人早前死撐係幫工黨「袋住先」，事隔兩日又改口，承認私人袋咗呢筆錢九個月咁耐，有人就質疑李卓人（阿人）變咗「李呃人」，處理獻金根本唔係「袋住先」，而係「袋落袋」，人民力量嘅立法會議員慢必陳志全尋日就玩阿人，一語雙關話：「李卓人用親身經驗告訴大家，『袋住先』會好麻煩」。
設計圖片及對白
慢必似乎係要單打政改嘅「袋住先」論，但以阿人收錢件事做對比，就似乎不倫不類，事關阿人以私人戶口袋咗第一筆獻金成九個月咁耐，而且一袋就九個月，期間袋袋平安，如果件事冇畀人揭發，會有乜嘢發展？冇人知，但可能性太多。更何況，袋咗錢嘅阿人由啱啱返港，到尋日嘅言論，已經一百八十度轉彎，立法會議員個人利益監察委員會真係應該向工黨了解清楚，究竟「袋住先」嘅事實基礎係乜？
引述東網報道攞彩
今次泛民多位議員被揭收受獻金而唔申報後，泛民幾黨齊齊落水，大家都好似夾住尾巴做人咁，慢必喺呢個時候，喺網上高調引述「on.cc東網」嘅報道，揶揄阿人「袋住先」袋出麻煩，真係夠寸。又係嘅，今次被揭獻金醜聞中，泛民政黨大都有份，但喺議會擁有兩個席位嘅人力就冇份，慢必一句抽盡政府同袋咗錢嘅阿人水，過癮喎！
不過，政改三人組呢輪成日游說港人，二○一七年一人一票選特首好緊要，即使唔係最理想嘅方案，大家都應該「袋住先」，原本以為呢句好使好用，點知收錢議員唔該都冇聲，就搶咗「袋住先」嚟解畫，唔知市民依家會唔會一聽到「袋住先」就扯火呢？
