城中鏡：商界巨頭 睇淡經濟
連日嚟港股係咁升，有股評人更預言恒指重上二萬八甚至三萬點指日可待，但縱橫香港政商界嘅香港工業總會（工總）主席劉展灝同香港中華總商會（中總）會長楊釗，就自言睇唔通香港股市同經濟增長前景。其中工總就將今年香港經濟增長嘅全年預測，由原來嘅百分之三點五至四，下調半個百分點至百分三至三點五，明顯唔多睇好。楊釗亦指最近港股狂升純粹係受惠於資金流入同「滬港通」，擔心美國一加息就會打回原形，呼籲小股民審慎投資。
中總連續多年贊助香港中學生變身「少年太空人」，認識國家嘅航天科技發展。
楊釗指美國隨時加息，對港股造成負面影響。
劉展灝話西非爆發伊波拉疫症，令港商更加唔敢到非洲投資設廠。
贊助少年太空人活動
楊釗尋日出席由中總贊助的「少年太空人體驗營2014」活動時，除咗呼籲香港中學生把握今次機會，認識國家嘅航天科技發展之外，亦同記者講起近日嘅港股升勢。
佢話今次升市係由美指帶動，有資金流入中港股市追落後，另一因素係投資者對盛傳十月正式通車嘅「滬港通」抱有期望，相信遲吓會有更多內地資金流入港股。但佢強調中長期市況並唔易睇，自己都唔敢太樂觀，事關美國已經開始出現通脹，隨時都可能加息，對港股造成負面影響。
唔驚狄波拉怕伊波拉
工總尋日總結上半年香港廠商經營情況，講到近期多個港商設廠嘅熱點，都先後發生動亂同傳染病等問題，嚇怕唔少廠商。劉展灝開玩笑咁話，「狄波拉我唔驚，伊波拉就真係好怕」，指越南早前爆發排華潮，西非就有伊波拉病毒，緬甸等新興市場嘅政局同營商環境始終唔夠穩定，令港商有錢都唔知去邊度投資好。佢本人依家喺香港、瑞士同東莞都有廠，如果要再加碼投資，佢都係會揀番廣東省，雖然成本已比以前提高咗好多，但始終好過去外國冒險。
佢又話未來香港廠商發展會更着眼於網上銷售，認為係開拓內地市場嘅捷徑。佢又提到貿發局都幫過好多商戶做網銷，但成功例子唔多，希望佢哋可以搞多啲相關嘅研討會，以及與內地嘅網銷平台合作，加深港商對網銷運作同產品宣傳工作嘅了解。
