SUN搞作：打橫嚟講：違反民情民意的反智垃圾
香港特區急速崩壞下沉，除廢柴政府庸官低B無能之外，親政府的一群跟尾狗奴才在旁搖旗吶喊，互扯貓尾，製造假象，才是主因！呢度又點會唔PK吖！
有個乜春「可持續發展委員會」嘅諮詢組織，就立法推行垃圾徵費，準備向政府提交調查報告。上月底，呢個委員會嘅主席陳智思喺會議上，建議立法按每幢住宅樓收垃圾費，費用由各業主攤分，即放棄逐家逐戶按量徵費的方案，這做法，正正係大大力打擊「滅廢」和「回收」垃圾的誘因。世上邊有人咁笨拙，推廣這反智嘅方案o架！
事實上，上述委員會曾收到五千份意見書，超過一半支持「按戶收費」，只得四分一人支持「按幢收費」，在此情況下，陳智思主席仍敢違反民意自把自為，何其討厭。佢嘅舉措，學足香港廢柴政府硬推「政改方案」的鄙劣手段。話說，廢柴政府收到十三多萬份政改意見書後，林鄭出來宣布「調查」成果，竟隻字不漏的，照讀「調查前」的政府願景新聞稿，視「十三萬意見書」如無物。今天，陳智思也不理過半數的「真民意」，又照推政府既定的「按幢收費」。喂！你究竟知唔知家陣有好多樓宇單位狂劏成十數個劏房，分租畀幾十人住，而有一啲舊樓只得兩老公公婆婆「獨居」，佢哋牙籤都唔多掉一支，要佢哋無收入、少掉垃圾的，分擔那些「一樓十四伙」的垃圾費？好唔公道啫！同時，亦減低「垃圾生產者」自付責任。
陳智思的公職王身份，往往叫人氣憤，例如，他替政府拍宣傳片，說假話，在推銷「三堆一爐」的片裏說：有好多國家蓋建的垃圾焚化爐附近，空氣質素好好嘅，仲係著名景點添喎！喂！你先搬去爐邊住，以身作則吧！嗱！佢尋日又唔認「只建議」按戶收費嘞！咁嘅人，肯定做大官人才！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
