由於立法會連續兩年審議財政預算案都遇到拉布，議員向當局提出書面問題質詢（Written Question）嘅數目亦有增無減，由前年嘅五千多條增至今年嘅六千八百多條，財經事務及庫務局局長陳家強眼見政府內部同事疑吃不消，早前建議以平均每人提六十五條Q為基準，今後每年財委會書面問題總數「劃線」喺四千五百條內，各黨派近日最近分別以聯署嘅方式去表達意見，結論係幾乎一致反對。

設計圖片及對白

泛民方面，曾提問多達六百五十多條Q嘅社福界張國柱聯同工黨黨友回應指出，當時全靠議員提出書面質詢同跟進，先至揭發「貪湯」前廉政專員湯顯明豪花公帑宴請、送禮等貪腐醜聞，反質疑當局嘅用意係刻意迴避議會監察。

同樣出名提問多多嘅公文袋陳家洛，佢所屬政黨雖無聯署回應，但該黨黨魁梁家傑都認同，唔應該對議員嘅權力有嚴格限制。白鴿黨更將書面質詢問題同憲制層面掛鈎，直言立會有無可取代嘅監察功能，行政機關有責任向立法機關負責，反建議財委會應該加開會議處理喎！

建制派亦罕有無同政府站在同一線，有個別建制議員雖質疑部分議員問題內容無聊，惟工聯會等建制派中堅分子，都同意泛民嘅理據，就係議員嘅權力唔應該被阻礙或削減。

一句到尾，陳家強嘅「劃線」建議似乎喺立會冇乜同道人，如果之後無乜奇招可以扭轉敗局，似乎都可以打定輸數，準備定明年要處理數目再創新高嘅Q都得嘞！

第一手消息請下載on.cc東網iPhone/iPad/Android/Windows Phone Apps