政壇：HMV轉型 兼賣潮衫求存
網上影音娛樂風行全球，傳統唱片零售行業逐漸式微，就連英國老牌唱片店HMV都避唔過呢一劫，惟有轉型求存，收到風佢哋收購咗一個潮流服飾App，今個八月，HMV中環分店將會加設時尚角落（Fashion corner），售賣潮流服飾。
胡景邵為HMV帶嚟一連串改革。（資料圖片）
因為負債超過二十億港元，HMV喺上年年初申請破產，但好彩喺緊急關頭畀私募基金「匯友資本」睇中，收購咗大中華區業務，救番HMV一命。
喺短短一年內，匯友資本嘅首席合夥人胡景邵就為HMV帶嚟一連串改革。佢唔單止引入新投資者，仲將HMV嘅業務拓展至音樂以外嘅範疇，轉賣「生活模式」，好似跑馬地嘅分店就喺上年完全轉型，化身成為音樂Café，仲相當受到年輕人歡迎。
據了解，嚟緊HMV會開拓埋潮流服飾、兒童同應用程式市場。而且公司行動力相當快速，佢哋啱啱就收購咗潮流服飾資訊應用程式viss.me，顧客可以喺呢個App上面，睇到最新款嘅設計師靚衫。而喺今個八月，HMV中環店就會加入Fashion corner，售賣本地設計師嘅作品，即係第日買唱片之餘，仲可以喺HMV度揀埋靚衫添！
