政壇：中學若罷課 教協唔想撐
為要挾本月底開會嘅全國人大常委會為港人落實「真普選」，路線愈走愈激嘅學聯正醞釀九月發動全港罷課，揚言規模勢比前年「反國教」罷課更大，隨時罷足一個禮拜都唔定。雖然人大常委會未有耐先開會，但據知學聯成員已經四出打聽自己嘅院校有冇教授支持罷課，唔少一直支持「佔領中環」行動嘅老師都願意出一分力。若果罷課行動「燒」到中學生，相信主導角色就會由學生轉移至老師，但據知擁有數以萬計老師會員嘅教協對老師罷課相當有保留，呢次唔知教協會長馮偉華點擺位呢？
設計圖片及對白
學聯秘書長周永康透露，單係佢就讀嘅香港大學，除咗市民耳熟能詳、一直支持學生運動嘅教授外，另至少有三個學院嘅教授表示會加入，希望參與嘅教授陸續有來。身兼中文大學社會學系副教授嘅「佔中」發起人之一陳健民亦都話已經有晒心理準備，但為咗照顧唔罷課嘅學生上堂嘅權利，考慮罷課期間照舊上課，兼抽時間分身為罷課嘅學生講課分享，更不惜另擇日子為罷課學生「補課」追番課堂進度。
教師曠工 各方壓力大
不過，有教協中人透露，教師過去只係曾經喺七十年代就文憑教師失業潮上街罷課，同其後「金禧事件」引發嘅萬人大集會外，未試過因為政治議題而發動罷課表態，加上教師肩負照顧學生嘅責任，隨便罷課不但背上曠工罪名，更要面對家長等多方面壓力，所以就算前年「反國教」期間，教協亦被指縮沙而令罷課行動不了了之。照咁睇，學聯都係疊埋心水自己玩算喇！
