SUN搞作：打橫嚟講：下屆新特首人選出現了！
香港終於出現了一件超級無敵「大能人」嘞！佢可算是我的新偶像。
封佢做偶像，係因為佢不單止絕頂禮義廉，仲係「能人所不能」的「能人中能人」！
登登燈櫈……佢就係「正能樣」（即係充滿「正能量的樣子」也）嘅英籍白頭佬張融嘞！
試問，喺今時今日香港地，除張融先生外，仲有邊條友可以在短短九日內，搵到九十幾萬人撐佢呢？
嗱！「佔中」呢個「違法行動」，話有七十幾萬人出嚟「公民投票」，喂！係有三條友吹雞o架！即每人只得廿多萬人撐咋！還須有「中央白皮書」和吳亮星「新界東北」的背後發功，才有此佳績，咁又怎及得張融一人呢？
張融的本領，不只限於一百幾十萬冇畀支槍指住嘅「自願者」出嚟簽名咁簡單，佢仲能召集及團結全港所有土共集團，及西環第二治港核心勢力都受佢指揮，咁先巴閉；連一男子也做不來的事，佢輕易便搞掂。我睇好佢，有機做下屆特首o架！
白頭張融口才演技出眾，日日苦瓜乾咁款面容，好憂國憂民，苦口婆心，將可能不存在的「佔中」，講到「大暴動」咁得人驚，將香港民生民情撕裂為「二元對立」，比一男子更懂得搞分化，確實能人之王，會得阿爺歡心！
能人王張融被揭有「敵國」居英權，佢話係為買個「保險」啫！咁又係嘅，佢做埋啲咁「折墮」工作，確要買「勞工保」加「意外保險」和「人壽保險」嘅！兼且，香港地都並非咁安全，有埋「水火險」也算合理！但做下屆特首，要放棄外國國籍先喎！佢又話「居英權」不能自動放棄的，咁又未必。佢係我新偶像，我當然要獻計畀佢：佢大可約電子傳媒直播，當眾用佢中學程度的流利英文X英女皇，包佢即時「脫英」，做個偉大中國正一能人。
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
