蘋果公司嘅「大芒」iPhone 6傳聞九月推出,「果粉」們引頸以待,但更緊張嘅莫過啲廠商們,因為蘋果訂單絕不容有失。台灣傳媒指iPhone 6生產商之一鴻海董事長郭台銘已飛到內地廠房,親自督工生產被指難度較早幾代高嘅iPhone 6。

郭台銘

傳聞蘋果公司下令廠商今年底前,付運最多達八千萬部4.7吋及5.5吋iPhone 6,兩大台灣代工廠鴻海同和碩傳喺八月要全速開工,而鴻海負責組裝七成4.7吋iPhone 6,更喺九月獨家生產「大芒」iPhone,難怪郭董今次要親統大軍,而且兵團還包括上萬台機械人。

鴻海旗下富智康早前引入了一萬台機械人生產iPhone 6,取名為「Foxbots」,每台價值二萬五千美元,蘋果公司正是今批機械人嘅首個客戶。加上5.5吋iPhone 6要做到更輕更薄,接觸感應器和液晶體顯示合二為一,又採用藍寶石晶體製造屏幕表面,生產工序異常繁複,可想而知郭董有幾緊張。

其實,郭董緊張不無道理,因為iPhone 6由於係大眾期待嘅大mon版本,再加上又係首次由富智康機械人Foxbots生產,如果呢批機械人生生性性嘅話,鴻海以後就唔使驚因為請唔到工人而頭痕啦!

第一手消息請下載on.cc東網iPhone/iPad/Android/Windows Phone Apps