一連五日嘅香港動漫電玩節尋日完結，主辦單位估計整個展期合共有七十五萬二千人次入場，比舊年上升百分之三點一。全場焦點「動漫Cosplay大賽」冠軍由鄭家龍與楊毓晴奪得，佢哋分別扮演電子遊戲《Final Fantasy Dissidia》嘅「Garland」同「Warrior of Light」；亞軍就由陳倩萍獲得，佢扮演日本動畫《進擊的巨人》中嘅「艾倫‧耶格爾」。

動漫節尋日正式完結，一眾動漫cosplay大賽得獎者成為全場焦點。

尋日係動漫節最後一日，有大批市民一早就到場排隊。有市民話希望購買遊戲機生產商附送嘅限量版耳機，亦有市民預計部分參展商會割價促銷，到場「執平貨」。有參展商話受惠於會場面積增加同兩大遊戲機生產商同場參展，生意較去年好。不過，有參展商認為今年旺丁不旺財，銷售情況與舊年相若。

第一手消息請下載on.cc東網iPhone/iPad/Android/Windows Phone Apps