雖然係大富之家,但買餸未必下下假手傭人嘅。富商邱德根太太邱裘錦蘭早幾日就一個人上陣買餸,貫徹邱家嘅慳家本色。當日下午時分見穿上杏色衫配同色外套、打扮樸素嘅邱太單拖行中環ifc超市,唔望真啲,仲以為佢係一般家庭主婦。期間佢好熟落咁將食物放入購物車,一睇就知係熟客。

邱裘錦蘭一手掃四包乳酪粉。

邱太細心研究包裝說明。

買齊四款口味氹老公

當日超市內人頭湧湧,為免畀人扒咗銀包都唔知,邱太小心翼翼將白色手袋放喺身前的購物籃內,然後推住購物車穿梭貨架。見佢主攻健康食品類,先買檸檬、果醬,粟米片,再睇吓即食意粉,全部不油不膩,夠晒健康。當行到一個售賣乳酪粉嘅貨架前,佢毫不猶豫一手掃四包,買齊提子、藍莓、檸檬同蜜桃味,每款一包,唔通想每日試新嘢?

買完乳酪,邱太再滋滋油油行去凍櫃前,俯身仔細揀冰鮮雞。雖然「來路雞」標價一啲都唔平,但佢好捨得,一手揀咗隻大肥雞,然後快步走去收銀處畀錢,期間仲拎出一個自備購物袋遞畀收銀員,認真環保。

趁邱太畀完錢,記者上前打招呼,佢笑笑口話乳酪係買畀老公食嘅,知佢食咗好多年,專登買多啲。估唔到食盡山珍海味的邱氏夫婦,都係平價乳酪的擁躉。邱太講講吓,大爆邱生近日牙力麻麻,唔可以咬硬嘢,但身體仍然好健壯。過幾日仲會舉家去馬來西亞旅行,享受天倫之樂喎!

第一手消息請下載on.cc東網iPhone/iPad/Android/Windows Phone Apps