喺前年反國教一炮而紅嘅學民思潮（學民），吸納咗大批中學生為骨幹，其中核心人物黃之鋒同周庭今年考完中學文憑試，如無意外會脫離中學生行列升讀大學或大專院校，而學民同一時間計劃招募新血並向大專生埋手，咁代表大專生嘅專上學生聯會（學聯）又要吸新血，咁似乎有搶客之嫌喎。話時話學民仔同學聯之前因意見不合傳出內訌，依家又有學民轉型搶飯碗疑雲，睇怕未來雙方明爭暗鬥會有增無減。

設計圖片及對白

仲等緊大學聯招放榜嘅黃之鋒同周庭尋日一齊出席電台節目，黃之鋒首先從個人出發，自言即使唔再係中學生，但暫時冇打算離開學民，如果升到入大學亦都冇打算選學生會或上莊。周庭則首次透露學民「升呢」大計，話學民未來會招募新血，除咗招收中學生成員，亦希望可以吸納大專生，又形容「學民思潮係學生組織，唔係中學生組織」。

有心水清嘅人話，學民「升呢」吸納大專生，首當其衝就係打正旗號代表大專生嘅學聯，事關佢哋成員以各大學學生會幹事為骨幹，加上呢班人活躍於公民社會，睇怕未來學民同學聯都會出盡法寶，邀請佢哋加入各自陣營。

第一手消息請下載on.cc東網iPhone/iPad/Android/Windows Phone Apps