政壇：美證交會巨額獎金籲舉報
《華爾街日報》專文報道，一項名為「深喉計劃」嘅最新進展，話說美國證券交易委員會（SEC）喺二○一一年推出這個「舉報者計劃」（Whistleblower Program），以巨額獎金鼓勵國民揭發罪案，提供有關企業或商家嘅違法證據。計劃至今已吸引來自六十八個國家、共六千五百位舉報者，有趣嘅係當中退休人士所提供嘅線索最多。
任何人若掌握充分證據均可向SEC提供自己及涉嫌犯罪者的基本資料、犯罪行為嘅內容。如果SEC認為消息來源可靠並且判斷當中有人涉嫌違反聯邦證券法，即會採取執法行動。若最後SEC成功擊破罪案並向違法者判處一百萬美元以上嘅罰款，檢舉者亦可獲得當中不多於百分之三十作為獎金。
雖然整個過程需時幾年，當中絕大部分的舉報最後都不了了之，但由一一年至今，計劃還是成功揭發咗五宗案件，相關賠償總額高達一億五千萬美元（約十一億七千萬港元），舉報者亦獲得超過一千五百萬美元獎金，當中嘅一千四百萬美元更係由一位揭發芝加哥商人訛騙投資者的舉報者所獲得嘅。
六千五百名舉報者來自社會各界，當中退休人士提供嘅線索最多，投資者同工程師則分別排名第二同第三，舉報者當中仲不乏服務性行業添！
