近年嚟香港嘅空氣愈嚟愈差,市民偶爾見到一片藍天白雲,精神都會為之一振,但偏偏天文台前台長「黑英」林超英就仍然係憂心忡忡,原來佢除咗欣賞維港罕見嘅「高清」藍天之外,亦會(目及)實衞星圖留意埋香港周邊地區嘅天氣,睇見珠三角地區上空依舊沙塵滾滾,令佢對香港嘅氣候前景繼續不敢樂觀。

林超英讚前日嘅維港對岸樓宇輪廓清晰。(資料圖片)

黑英尋日喺佢最新一篇網誌,大讚前日嘅維港對岸樓宇輪廓清晰,感覺有如睇緊高清電視。佢仲專登望過人造衞星圖片,望到香港同廣東東部地區喺海洋空氣覆蓋下,視野良好,景物清晰可見,但係澳門至廣州嘅珠三角地區,卻被一重輕紗罩住,因而睇唔清地面情況。佢慨嘆雖然香港工業經已北移,但不時仍受到由廣東省吹落嚟嘅污濁空氣影響,視線通透唔係理所當然,市民應為香港可以享受到來自海洋嘅清新空氣而感恩。

講開粵港空氣質素,政府咁啱喺尋日宣布,環境局局長「星星」黃錦星今日會率團前赴廣州,同廣東省代表共同主持關於粵港應對氣候變化嘅會議。唔知黑英呢篇文章,係咪有意寫畀佢老友星星睇嘅呢?

第一手消息請下載on.cc東網iPhone/iPad/Android/Windows Phone Apps