政壇：倫敦「唇膏塔」就快再易手
同樣出自滙豐總行設計師霍朗明勳爵手筆嘅倫敦金融城地標「唇膏塔」（The Gherkin）就快再易手！話說負責安排易手嘅第一太平戴維斯依家正密鑼緊鼓將佢放售，仲會開個精美嘅網站推銷，心水價介乎六億至六億五千萬英鎊（約七十八點九五億至八十五點五二億港元）。
「唇膏塔」正密鑼緊鼓放售。（資料圖片）
第一太平戴維斯倫敦中部投資主管Stephen Down對「唇膏塔」信心十足，拍心口話棟樓保養得非常好，預計九至十月就賣得出，仲透露已經有幾個財團有意收購，潛在買家話唔定係中東、亞洲嘅主權基金，或者係大型退休基金或私募基金。
今次已經係「唇膏塔」七年嚟第三次轉手，事關上一手業主、昔日德國最大地產商IVG Immobilien旗下基金○七年斥六億英鎊由瑞士再保險買入「唇膏塔」，大部分貸款瑞郎，冇做對沖，好衰唔衰瑞郎過去七年兌英鎊升咗差唔多百分之六十，令債務不斷攀升，卒之頂唔順，要由另一間德國公司Deutsche Fonds Holding三月中買起IVG對「唇膏塔」嘅業權。
但可以肯定，「唇膏塔」轉手絕對唔代表倫敦樓市就嚟出事，事實上，當地甲級寫字樓不知幾搶手，有意收購嘅財團認真進取。
