政壇：單雞為政改戰囉囉攣
特區政府已向全國人大常委提交政改公眾諮詢報告，預料最快八月底全國人大常委就會就嚟緊嘅政改定下框架。政府同泛民主派依家都嚴陣以待，原來除咗特首辦同多個政策局已劃定死線，官員要放假就要喺下個月中前放晒佢之外，原來有泛民立法會議員都畀政改搞到囉囉攣，唔知去唔去旅行好咁話。
設計圖片及對白
我哋日前都報道過由於政改一役不容有失，有消息人士就透露特首辦、政制及內地事務局、民政事務局等有關決策局各級人員已陸續收到溫馨提示，想放假就要趁早，總之下個月十五日之前就要「全線歸隊」，為政改作準備。點知原來泛民主派嘅立法會議員一樣為政改緊張兮兮。
若群情洶湧就行唔開
白鴿黨嘅立法會議員「單雞」單仲偕以前鍾意潛水，原本打算趁今年立法會放暑假就鬆一鬆，同太太去希臘小島旅行，點知佢喺美國讀書嘅細仔就返咗嚟香港，喺一間科技公司做實習。單雞兩公婆梗係唔想揼低難得返香港嘅囝囝啦，於是就決定等囝囝八月底返美國開學，佢哋先至出發，仲已經訂好晒機票同酒店添！
本來一切都盡在掌握中，但依家單雞個心就囉囉攣唔知點算好，皆因佢嘅如意算盤未必打得響喇。單雞話原本諗住政府年底推出政改方案後，大家不滿政府嘅方案先至佔領中環，所以九月同太太去吓旅行、拍吓拖都冇問題。之不過，學聯就講到明會發起一連串行動，包括九月罷課等，萬一群情洶湧即刻佔中就行唔開咁話。如果真係咁，睇怕單雞就要同希臘嘅陽光海灘緣慳一面喇！
