香港廢柴政府前朝庸才中，成事不足、糗事成籮的小丑輩多的是，只可惜，佢哋地位低微，鮮有機會在電視螢幕獻醜，娛樂大眾！尤其佢退朝收皮後，更像人間蒸發，仲以為佢走咗添！

哈！估唔到，有位舊電池音容尚在；前日，佢以「國際專業管理學會」會長身份，出席港台的《城市論壇》。

話時話，點解全港咁多人唔搵，係要搵呢件騎呢怪講「政改佔中」呢？讓悲慘社會多點歡樂？究竟邊個集團「落柯打」安排的呢？「佔中」同「政改」關國際專業管理乜叉嘢事呢？好吖，就睇吓佢有乜高見先！

江湖大名鼎鼎的「乜爺」，果然名不虛傳，跟佢舊老頂「老董」般廢到無朋友，講足三分鐘，仲不能入題，只見佢手舞足蹈，表情豐富（實是over act），唔知仲以為佢問米請咗梁醒波上嚟。偶爾舉起雙臂，學闊太那招單鈎螳螂手，又或頓然轉身，連座椅一百八十度大迴轉，十分賞心悅目，好耐無見過咁滑稽的老丑生演出了！喂！得閒多啲上電視呀！

乜爺不特止身手動作連環不停，講話內容更無出其右，能人所不能，敢於喺公共空間公然生安白造，說佔中發起人戴耀廷鼓動少年人「違法」，被戴指摘佢「講嘢須搞清事實」，因戴真係一直只倡議四十歲的成年人出來佔中，無叫細路仔上陣！乜爺仲要死撐，話香港係有言論自由嘅，佢有權憑佢誠懇嘅感覺，講佢感覺嘅嘢喎！

哦！咁都得？我也很誠懇感覺到乜爺「有特別品味」、「有癖好」、「愛食老年發霉豬扒」囉！咁得唔得先？憑感覺？

呢位乜爺咁嘅「素質」（大陸語），那檔乜乜國際專業管理學會確實巴Q閉，只可惜，乜爺亮相前，鼻樑上欠了一笪白油彩，否則，更頂癮叫絕！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps