愛狗之人傅明憲尋日出席「愛護動物協會慈善獎券2014抽獎儀式」，作為會長嘅佢透露，歌手孫耀威係活動宣傳大使，並為活動作主題曲。佢又開心透露今年籌到嘅善款比舊年增長咗百分之二十一，又話：「我自己上年籌到五位數，今年有六位數。好多朋友幫我買獎券，都冇問到有乜嘢獎品，一嚟就一舊錢畀我。」

傅明憲好開心為愛護動物協會籌到更多善款。

另外，佢仲好開心咁話，唔少娛圈嘅朋友義務做宣傳，謝天華、古天樂同古巨基等都有幫手拍攝宣傳單張。

佢又坦言事先知道好友古巨基同助手女友Lorraine結婚，仲透露送咗水晶相架畀佢哋做結婚禮物，仲講笑話喺佢哋擺酒時要送上多仔佛添！佢話：「想佢哋快啲生，因為佢哋鍾意小朋友。」有冇諗過飛去見證佢哋結婚？佢就話：「最好，但好多嘢配合唔到，見證佢生BB嗰刻啦。叫佢快啲生，努力造人。」

第一手消息請下載on.cc東網iPhone/iPad/Android/Windows Phone Apps