城中鏡：濕平享天倫 唐太「跟得」樂
前日喺金鐘見到前政務司司長唐英年一家人一齊「濕平」，唐唐同兩位千金對樣樣嘢都有興趣，周圍睇呢樣睇嗰樣，但唐太郭妤淺就全程跟喺老公同兩愛女身後，左右奔波樂做「跟得」夫人同媽咪。
唐英年（右二）、太太郭妤淺（右三）同兩愛女（左一及右一）開心討論化妝品。
唐太郭妤淺（箭嘴示）全程樂做「跟得」夫人同媽咪。
唐唐三父女上咗三樓後折返落二樓，同慢一步上緊電梯嘅唐太打招呼。
當日下午三點幾鐘，唐唐同太太帶埋兩個囡囡一齊喺金鐘廊睇化妝品，唔好以為化妝護膚係女士專利呀，佢哋三父女一時聚埋一齊互相畀意見，聽售貨員解釋，一時就各自分頭逛，一個東一個西，搞到跟喺身後嘅唐太兩頭擰索晒氣。
唐唐貪靚睇護膚品
期間唐唐仲對一系列有美白功效嘅護膚品好感興趣，拎起睇咗一陣，估唔到佢都咁貪靚。
三個人揀完一輪護膚品之後轉移陣地，行去太古廣場再戰。呢個時候先見到原來唐唐囡囡隻左手整親包紮住，但亦一啲都無損佢哋行街購物嘅興致。三父女帶頭由二樓搭扶手電梯上三樓之後，突然改變主意搭番隔籬條扶手電梯落二樓，行得比較慢嘅唐太當時仲搭緊扶手電梯上三樓，搞到唐唐三父女喺隔籬扶手電梯同佢揮手，真係唔知好嬲定好笑。
唐太一追再追，經歷完「上咗去又落番嚟」之後，一家四口就去咗超級市場睇食品，唐唐三父女又四散，一時睇吓朱古力，一時又喺雪櫃前駐足好耐（目及）住啲雪糕眼定定，總之喺貨架之間左穿右插，最後買咗兩大袋戰利品離開。
