政壇：搞搞政：周一鑊四處辣火頭 圖賴死唔走抓着數？
有「每周一鑊」之稱嘅食物及衞生局前局長周一嶽「翻閹」做平等機會委員會主席後就周圍點火頭，佢喺舊年四月上任就話要就反性傾向歧視立法，有關條例牽涉範疇甚廣，無論喺社會定係宗教界都惹嚟好大嘅爭議，唔係一時三刻可以成事。不過，佢一鑊未平一鑊又起，揚言話要就《種族歧視條例》、《性別歧視條例》、《殘疾歧視條例》同《家庭崗位歧視條例》四條現行條例進行檢討，包括將佢哋合而為一咁話。今個月初平機會仲就此展開咗為期三個月嘅公眾諮詢添！
設計圖片及對白
恐累下屆政府執手尾
周一鑊所講嘅檢討四條現行條例牽涉到多個範疇，以《種族歧視條例》為例，話要延伸至無論係唔係香港居民、居港年期幾多、係旅客同移民都要受到相關保障，好大機會會辣到新移民嘅福利政策同個人遊等問題。咁搞法真係分分鐘發水發出禍，最終搞出個大頭佛，不單連累今屆政府，相信下屆政府都唔好過，隨時要執佢啲蘇州屎。
藉口工作未完博連任
佢嘅任期只得三年，依家差唔多過咗一半，大可以好似以前喺政府做「廢官」咁渾渾噩噩過日子，何解突然咁積極？熟悉當中情況嘅人就透露，周一鑊大力發水其實只係為咗可以喺任期屆滿之後有藉口話仲未完成工作，繼續喺度賴死唔走，兼且又乘機四圍着數咁話。如果周一鑊真係咁盤算，勸佢都係死心，因為佢隨時會畀自己辣着嘅火頭搞到火燒身，能否完成今屆任期都成問題呀！
