政壇：柳傳志千金棄投行做Call車女王
內地搵車App紅起來，全靠騰訊同阿里巴巴激鬥，就連重量級嘅投行界人物，聯想控股董事長嘅女兒柳青，尋日都宣布將過檔由騰訊投資嘅搵車軟件「滴滴打車」，並出任首席營運官。柳青嘅投行背景令市場對滴滴嘅發展部署產生唔少聯想。
柳傳志早前用板腦介紹女兒柳青。（資料圖片）
作為內地IT教父嘅女兒，柳青喺高盛由分析員逐步升任為該行最年輕嘅其中一位亞太區董事總經理，喺私募同風險投資上甚有名氣。柳青尋日形容加入滴滴後，佢嘅身份已由職業經理人轉做創業合夥人。行內人亦注意到柳青做高盛時，原來曾經參與美國搵車軟件Uber嘅融資事宜，足以顯示佢嘅加入，明顯係協助滴滴嘅下階段發展，甚至為未來上市鋪路。
知己知彼助打Uber
講開Uber，近期正着手開拓中港市場，巧合內地近期亦傳出騰訊喺投資滴滴之餘，近日亦參與一項名為「U優打車」嘅商務搵車軟件嘅籌辦，「U優打車」據報更係由滴滴嘅其中一個副總裁帶領，就目前嚟睇「U優打車」似乎係當Uber做假想敵，如若滴滴對「U優打車」嘅參與屬實，曾經協助高盛處理Uber事宜嘅柳青，或者可產生知己知彼嘅作用。
