政壇：八達通CEO享受做宅男

作為金融界嘅高層，成日要周圍飛，真係有啲似無腳嘅雀仔，可能就係咁，加強咗八達通新任CEO Kevin高敏德選擇呢份新工作，佢話：「酒店嘅床鋪唔係唔舒適，但始終唔及屋企嘅好，依家好Enjoy放咗工，返到自己屋企嘅感覺」。

第二次在港工作嘅高敏德，勁讚香港人夠效率。（資料圖片）

之前喺萬事達卡做高層嘅Kevin經常要公幹，至三月底於八達通履新後，就同太太喺香港定居。原來佢哋都勁好網球，太太仲一個禮拜打幾次，佢笑言兩人已見識過香港唔少網球場。

至於上任後首要工作？Kevin話要與同事好好溝通，亦因為咁，佢喺五月開始新開咗個網誌，但只畀約三百五十名八達通同事「享用」。

八達通嘅個人對個人（P2P）轉帳交易服務，朋友間食飯夾錢都可以一嘟搞掂，好多人都引頸以待，但Kevin就大賣關子，話收到邀請函就知幾時出街。無他嘅，八達通同港人關係密切，出新服務不容有失，時間早定遲唔係問題，最重要始終係服務質素。