今個月初啱啱由新加坡國立大學過檔香港大學法律學院新院長嘅Michael何耀明,將會做足十二年到六十五歲退休。好多香港人成日「返工等放假」,Michael似乎就冇呢支歌仔唱喇,皆因前院長聲稱做咗十二年都冇放過假,佢講笑問前院長:「點解當初唔同我講?」

何耀明放假最愛去潛水,可惜佢份院長新工冇得放假「潛水」。(受訪者提供)

何耀明

冇得放假嘅其中一個代價,就係冇得去潛水。話說Michael二十幾年前同班朋友齊齊學潛水,點知一學就愛上,周不時去沖繩、菲律賓、馬來西亞同印尼潛水。佢話自己教開書,唔想放假都教書,所以唔會教人潛水喎!

Michael來港後對衣食住都算適應,但「行」就似乎要了解多啲,因為有朋友叫佢點都唔好搭俗稱「亡命小巴」嘅紅Van。佢又呻香港討論時政大多用中文,對於佢平時只能問路及講「唔該」等簡單中文嚟講,就未必可以深入了解喇。

新人上場大計多多,佢初步諗住與同為普通法嘅印度法律院校學生及教授交流,又約緊律政司司長袁國強、終院首席法官馬道立同兩個律師會會長見面。

第一手消息請下載on.cc東網iPhone/iPad/Android/Windows Phone Apps