政壇：立會外訪分飛避「難」
喺馬航客機失蹤事件後，再有馬航客機被擊落同台灣復興航空航機澎湖墜毀事件，航空事故接二連三，引起外界極度關注。考慮到立法會議員嘅安危，立會行政管理委員會原來去年早有先見之明，通過咗決定凡議員集體出埠外訪公幹時，每班航機唔畀接載超過一定數量嘅議員，以免航空意外令議員全軍覆沒。今年四月立會嘅上海之行，就係佢哋第一次實行呢個規定，將議員分開兩班航班來往上海。
設計圖片及對白
空難頻發 更顯重要
事緣舊年立法會環境事務委員會赴南韓首爾進行職務訪問，其中保險界議員陳健波一向對飛行安全特別留意，仲習慣喺出發前查看所乘搭航空公司嘅飛行記錄。不過，佢睇完之後唔係好滿意韓亞航空嘅表現，仲提出好多較具規模嘅大公司，當有過半數高層需要外訪工作時，都會被安排分開乘搭唔同航班，減低佢哋集體遇到意外嘅風險，但佢話當時冇乜人理佢，而機票又差唔多要落實，所以佢就自己訂咗國泰航空嘅機票分開前往。
其後佢哋去完南韓返港，大家都開始坐低正視呢個問題，並決定落實通過每班航機唔會接載超過三分一議員嘅規定，誰知通過後不久，議員之前乘搭嘅韓亞航空公司隨即喺去年七月，有一班由南韓仁川飛往美國三藩市嘅航班喺降落時墜毀，大家因此更明白分散風險嘅重要性。
直至近期馬航等多宗航空事故發生，我哋問起陳健波嘅睇法時，佢就話通過咗呢個規定後放心好多，好似上海之行咁，幾十人分開兩班機，至少一齊出事嘅機會細咗好多，而且佢仍然覺得搭飛機係好安全嘅。
