城中鏡：陳裕光拉隊唱談人生
音樂係一個紓緩壓力嘅好方法，無論聽歌定唱歌都一樣咁享受，大家樂主席陳裕光最近就搞咗個歌唱比賽，畀年輕人追夢。日前佢更號召一班熱愛唱歌嘅企業家好友，參與「與CEO對唱」環節，期望年輕人透過音樂交流學習做人處事道理。
陳裕光（左）搞歌唱比賽，「AO歌王」楊立門現身撐場。
莊家豐（中）同陳浩寧（右）早喺紐約工作時認識。左為陳浩寧老公趙益坤。
陳碧鏵每周做三日運動健身，難怪身形保持得咁好。
八達通前行政總裁陳碧鏵當日亦罕有現身，自從佢離開八達通公司之後，歷任無綫電視同恒隆集團高層，舊年離開恒隆後就一直好低調，原來期間佢又去過另一間公司打工，但今年四月已經離職，依家放緊悠長假期，享受生活，包括每星期做足三日運動健身，以及專心陪佢口中嘅「四條King」，即係佢老公再加三位十歲到二十三歲嘅仔仔，難怪佢身形保持得咁好啦！
同場仲有「AO歌王」之稱嘅民政事務局前常任秘書長Raymond楊立門。睇見Raymond穿上一件花花襯衫搭配白色長褲，成個情歌王子咁，離開「熱廚房」後心情有幾愉快一目了然。
楊立門無官一身輕
佢笑笑口咁表示，啱啱先同家人去咗法國和西班牙、以自駕遊方式玩足兩個禮拜，盡情吃喝，心情前所未有咁輕鬆。相比起以前就算出埠旅行，都要時刻查看電郵同手機訊息，頭腦又要隨時保持清醒，連酒都唔敢飲多一杯，依家真正係無官一身輕。
莊士集團太子爺莊家豐亦有參與今次活動，原來佢同陳裕光嘅女兒陳浩寧，早年喺紐約工作時經已認識，同陳浩寧老公趙益坤亦相熟，所以今次一定要嚟支持吓。陳浩寧透露自己都好鍾意唱歌，認為香港人工作壓力大，唱歌係其中一個減壓嘅好方法。問佢依家最多唱咩類型嘅歌，佢就答係兒歌，而且仲同老公一齊唱，原來係唱嚟氹吓一歲幾嘅寶貝仔開心！
