政壇：搞搞政：鬍鬚曾掛住玩懶理政事
話說立法會喺本月中趕及暑假休會前通過俗稱樓市「辣招」嘅雙倍印花稅條例草案，財爺鬍鬚曾即時話放下心頭大石，但同一時間政府都有多個新火頭湧現，包括添馬艦政府總部新增圍欄令「門常開」變「門常關」，政改方案「袋住先」同「真普選」嘅討論漸趨白熱化等，鬍鬚曾身為問責高官理應幫手出謀獻策「拆彈」，但佢竟然有時間去咗荷里活道已婚警察宿舍活化而成嘅「PMQ元創方」，疑似一副懶理世事嘅模樣。
設計圖片及對白
之前為咗爭取預算案同辣招獲立會通過，鬍鬚曾之前嘅網誌大多係呼籲議員停止拉布，當一切都過咗關，佢喺最新嘅網誌以「軟實力」為題，自爆最近去咗「元創方」探訪數名年輕創業者，又試埋製作分子料理嘅餐廳。
有人話鬍鬚曾就算唔使好似部分問責官員，日日輪流為突發事件「撲火」，都唔使擺到一副掛住玩，好似乜都唔關佢事咁款。
究竟鬍鬚曾會唔會意見接受，態度照舊？下周最新網誌自有分曉！
