人大咗總喜歡緬懷過去，新民黨主席葉劉淑儀都唔例外，佢尋日出席電台節目時，一方面話香港現正面臨政改嘅關鍵時刻，另一方面又透露早年出席十八區業餘歌唱比賽，聽到歌手張學友演唱《大地恩情》一曲，感受到歌曲帶出濃厚嘅鄉土情懷，覺得當年中港關係比依家更加和諧。全國人大常委會喺八月底將就政改訂下權威框架，唔知葉劉呢番感受對政改下一階段工作有無乜啟示呢？

葉劉喺節目中又話，香港今時今日嘅繁榮得來不易，唔少年輕人未必知道繁榮並非必然，但同時承認雖然香港社會現時發展成熟，機會相比以前少咗好多，勉勵港人唔應該氣餒，要堅持奮鬥精神，克服困難。

曾任保安局局長嘅佢又提及，留意到近日有民調話警隊民望下跌，但認為警方唔使太過介懷民望，又話有國際商會代表讚揚本港警方專業，連清場呢啲工作都只係動用好少武力，希望市民多啲體諒警方喎！

第一手消息請下載on.cc東網iPhone/iPad/Android/Windows Phone Apps