明年就係新一屆區議會選舉，喺上屆區議會選舉僅以三百多票之差落敗嘅富貴黨青年團主席李梓敬，今屆打算捲土重來，不過唔打算喺原區上演復仇記，而係積極考慮喺自己住緊嘅九龍塘又一村參選，單挑分屬經民聯嘅深水埗區議會主席郭振華，都咪話唔藝高人膽大，兩工商界政黨新仇舊恨一觸即發。

郭振華

李梓敬

據聞李梓敬自從積極考慮轉區至又一村選區參選，已做定晒準備工夫，包括做咗又一居同又一村花園嘅業主立案法團委員，加上該黨批發及零售界議員方剛係當區街坊，飲食界議員張宇人曾喺該區開餐廳，再加上當區有唔少紡織界中人，紡織及製衣界議員鍾國斌料喺當區有一定影響力。

李梓敬似乎喺地理上有一定優勢，但郭振華都喺當區連續兩屆擊敗對手當選，而且得票有增無減，睇怕呢場建制派內訌將會好戲連場。

第一手消息請下載on.cc東網iPhone/iPad/Android/Windows Phone Apps