NBA球星林書豪嘅「林瘋」吸引到萬千少男少女拜倒喺佢之下。正因係咁，唔少大品牌搵佢做代言人，又或者投資落佢所屬嘅球隊，其中中興通訊喺舊年底就因此贊助火箭隊，不過，林書豪嚟緊新球季將轉投湖人，咁搵咗火箭做代言嘅中興咪好蝕章？

林書豪在亞洲極具人氣。（資料圖片）

對於林書豪離隊，中興通訊副總裁兼終端亞太獨聯體區CEO張樹民，就話無打亂到中興嘅宣傳部署，佢話火箭隊都仲有好多球員受大中華區球迷歡迎，唔使擔心喎！話就咁話啫，但都幾戥佢擔心。雖然佢簽火箭時係搵前鋒帕森斯做代言人，但林書豪嘅人氣都係考慮因素之一，依家佢走咗，唔多唔少都有啲影響，而且呢排火箭嘅表現又麻麻地，究竟幫唔幫到中興宣傳手機業務都係未知之數。

其實呢啲大品牌諗搵咩球隊做代言人都幾頭痕o架，一時又要諗球星夠唔夠出名，一時又要睇隊波表現成點，呢啲嘢連黃大仙都睇唔透，惟有望唔係倒錢落鹹水海啦！

第一手消息請下載on.cc東網iPhone/iPad/Android/Windows Phone Apps