城中鏡：飲食名人出書 回味老香港
精於廚藝的中電企業發展總裁莊偉茵夫婿Adam黃楚權，最近將佢媽咪喺六十至八十年代經常煲畀家人食用嘅愛心湯水整理出書，咁啱時裝設計師William鄧達智亦聯同家姐鄧桂香合著一本講述元朗地道飲食嘅書籍。佢哋寫書目的都係為咗記載上個世紀嘅香港飲食滋味，以免老味道失傳，講起昔日味道，回味無窮。
陳紀臨同太太方曉嵐聯手寫食譜，十分合拍。
鄧達智（右一）緬懷昔日元朗美食。
好煮得嘅黃楚權，延續媽媽炮製愛心湯水畀家人嘅任務。（資料圖片）
William話元朗除咗馳名嘅烏頭魚同絲苗米，亦遍布好多野果野菜，記得細個時唔使問父母攞錢買零食，口痕想食嘢時，隨手摘野果就可以醫肚。不過，隨着新界村莊逐步城市化，呢啲咁令人回味嘅元朗土產就買少見少喇！
用料不同 愛心如一
Adam就話，由於時代嘅變遷，煲湯材料亦今時唔同往日，好似冬蟲夏草以前售價唔貴，所以好多人都鍾意用嚟煲湯。以前香港人餐桌上常見嘅湯料例如胖大海、天花粉，現時亦成罕見之物。雖然湯水用料唔同晒，但係湯水所蘊含嘅人情味就始終如一。佢話多年以來媽咪都用愛心炮製靚湯滋潤家人，惟近年來老人家健康狀況唔好，故此佢就負起為家人提供湯水嘅重任，亦希望藉住呢本湯譜，作為對媽咪嘅一份敬意。
另外，專寫食譜嘅陳紀臨同方曉嵐夫婦又有新書出爐，陳紀臨話昔日港人常以海產入饌，所以香港菜同愛用河鮮嘅廣東菜其實有區別，但由於好多海產無法人工繁殖，加上過度撈捕，老一輩熟悉嘅食材已從餐桌上絕迹，例如舊時街市常見嘅池魚，對好多後生仔嚟講，真係聽都未聽過。
