SUN搞作：打橫嚟講：香港城管化的暴力社會

點解？因為會學壞囉！

香港電視劇（尤其是無綫電視台的）多有不雅和暴力、性愛場面，但佢哋會按廣播條例，在劇集播映前宣布內容有景轟，叫家長陪同子女觀看；不過，播新聞呢？話之有幾暴力和兇狠，在「新聞自由」的光環照護下，會「如實」直射入觀眾眼簾內，但從不會在啟播前Warning預告喎！

可以教壞兒童的粗暴行為嘅畫面，遠的，有七月二日凌晨至朝早，香港差佬喺中環武力清場，抬走「和平靜坐」的群眾。大家可以從螢光幕見到「前線執法者」點樣武功蓋世，施展屈手搣面叉頸撳人中的絕技，同時，當然亦看到聽到被虐者痛楚扭曲的面容和慘叫聲，咁都未算「暴力」；最終，見有件幾粒花嘅警官直斥「被抬走」的「暴民」如何不是，警隊怎樣「克制」，咁先最暴力呀！

心智未成熟的稚子，「睇電視，學暴力」，除動作外，語言意識壞影響更甚。

好啦！警察都話係「合法行使暴力的特權分子」啫！估唔到連商場的「食蕉」（又名「實Ｑ」）也有樣學樣，在傳媒鏡頭前老奉行兇。嗱！前日，領匯小股東到股東會場「問責」，竟被「食蕉」們粗暴對待，批扯衫，拖拉離場掟入升降機。從新聞畫面看到，其兇殘程度不下於香港（沒有「皇家」二字的）警察哥哥，事後那件乜叉「企業傳訊對外關係總監」盧炳松竟敢說咁做係「保障其他股東利益」，佢真係夠料加入大話精廢柴政府，一定做大官。

小朋友睇得多此類粉皮面口，將來點分得出是非黑白？暴力動作場面已經夠恐怖的了！今天，一大棚人獸不分的異稟攻破了新聞道德底線，肆無忌憚地在大氣電波亂吠行惡，才是最可怕啊！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府