政壇：孔令成唔扮鬼樣嚇人
就嚟係農曆七月盂蘭節，海洋公園又搞「哈囉喂」活動，但本月啱啱上任嘅新主席孔令成同副主席劉鳴煒尋日同傳媒聚會時，就「談鬼色變」，拒絕用「鬼樣」見人，異口同聲話前主席有「扮嘢文」之稱嘅盛智文係扮鬼嘅最適合人選，無人可取代，仲暗示扮嘢文可能會復出扮鬼添！咁扮嘢文咪可以繼續搶晒風頭？
孔令成（左）同劉鳴煒（右）都拒絕喺「哈囉喂」活動扮鬼。
正當外界關注緊孔令成如何能超越扮嘢文深入民心嘅主席形象，以及會否擔心扮嘢文出任大樹灣發展項目顧問會畀人「垂簾聽政」嘅感覺，孔令成就定過抬油，仲打趣話：「佢（扮嘢文）好即係我好，絕對唔介意」，聲言每個主席都有壓力，邊個做都唔緊要。佢仲自爆同扮嘢文好老友，成日傾電話，明白對方嘅想法。
孔令成想當年話○三年沙士嗰時，佢同扮嘢文一齊獲政府委任入海洋公園董事局，當年「睇到盤數都嚇一跳」，估計全年虧損五千萬元，但最終埋單賺咗過億元，佢盛讚扮嘢文係金手指，推出嘅項目都成功同有錢賺，所以董事局對扮嘢文留任顧問無人投反對票喎！
