政壇：李漢奸民主阿婆玩完 不如認老早退役
外號「李漢奸」嘅民主黨創黨主席李柱銘同「民主阿婆」前政務司司長陳方安生，早前訪英「唱衰香港」時遭英國政府冷待，喺英國國會聽證會更被不同黨派議員聯手噴到一面屁，表現極度狼狽，自取其辱。有知情人士透露，其實兩人被冷待早屬意料中事、有迹可尋，最主要死因係衰老實，喺正式出訪前公開落英國佬面，質疑對方為咗賺人民幣而唔敢得罪中國，奈何兩人均已老到懵懵哋，踩咗落陷阱都唔知。
設計圖片及對白
有人形容李漢奸同民主阿婆就好似啲冇晒戰鬥能力嘅老兵咁，完全Out晒，無論以前為反中亂港立過幾大功勞，最終都難逃畀人用完即棄、被迫黯然退役嘅命運。如果英國佬將來要搵人喺香港搞事或做代言人，睇嚟都要搵過第二隊人至得喇！
英副首相接見實敷衍
李漢奸同民主阿婆早前出訪美加「唱衰香港」，獲美國副總統拜登「路過」接見，當堂令兩老心雄，諗住今次訪英都會有禮遇。其中民主阿婆更喺正式啟程前，以「鬧定先」姿態質疑英國响香港政改問題上冇美國老大哥咁積極，違背前英國首相馬卓安當年對《中英聯合聲明》嘅承諾，擔心依家嘅卡梅倫政府只顧商業利益，唔敢得罪中國政府云云。民主阿婆呢番言論事後畀國際傳媒引述，連帶英國本地傳媒都對卡梅倫政府口誅筆伐。
兩老當時仲以為可對卡梅倫政府產生壓力，但由於英國佬真係收咗人錢唔敢鬧中國，兩老將呢個「不能說的秘密」唱到開晒巷，搞到虛偽得嚟又要面嘅英國佬惱羞成怒，起初只肯派出較低級嘅英國外交及聯邦事務部國務大臣施維爾接見佢哋。兩老之後又跪又拜，卡梅倫政府終於再改派副首相克萊格會見兩人，令兩老以為執到寶，諗住之後出席英國國會聽證會時實會有大批議員撐佢哋。
不過，有熟悉英國政治同港府駐外工作嘅人士話，卡梅倫政府係英國歷史上罕有嘅聯合政府，克萊格係來自聯合政府內嘅少數派自由民主黨嘅代表，本身冇乜實權，同美國副總統拜登完全唔同級數。而施維爾同克萊格喺會見兩老期間，亦未作出過任何多於英方一貫立場嘅承諾，顯示卡梅倫政府根本純粹係應酬吓兩老，同馬卓安時代完全係兩個世紀嘅事。
年屆七十六歲嘅李漢奸同現年七十四歲嘅民主阿婆，似乎已老到五感不全，照樣毫無防避咁出席英國國會聽證會。當面對來自不同黨派嘅英國議員，罕有口徑一致質疑佢哋曲解「一國兩制」同白皮書，仲直指兩人係咪講過英國政府唔夠美國咁有「吉士」時，兩老先知道自己中伏，但已一時反應唔切，口窒窒瘀爆收場。經此一役，睇嚟兩老嘅政治影響力已正式宣告玩完，不如認命早啲退役好過啦！
