城中鏡：維達CEO讚紙巾裙吸睛

維達尋日攞咗條細路女裙仔畀大家欣賞，白白淨淨成件公主衫咁，睇真啲原來係用紙巾整出嚟，維達行政總裁張東方話小model曾經着過條裙仔做宣傳活動，個活動搞得幾有noise，喺內地有過億click rate，見外界都幾like，覺得幾幫到個品牌，佢話未來會繼續諗新嘢去吸引吓大家注意喎！

主席李朝旺話唔知一條裙仔成本係幾多，紙巾就平喇，最貴係人工囉。佢賣花讚花香，讚紙巾裙質料唔錯，無打底都唔怕走光。大熱天時，大汗得滯會整溶條裙，咪醜死鬼？李朝旺話啲紙巾連撈金魚都得，大汗又算得係乜。佢講笑咁話下次考慮吓用白馬王子look見記者，就係用紙巾整套白色西裝。