香港福建同鄉會日前舉行七十五周年晚宴,城中閩籍名人傾巢而出,做高級亞麻紗生意嘅保良局前副主席Albert顏金煒亦有現身。Albert話近日將啟程去非洲埃塞俄比亞考察,事關當地成為全球紡織業嘅寵兒,個個爭相去設廠,所以佢都唔執輸要親自去睇睇。

顏金煒(右)將到埃塞俄比亞考察及研究設廠嘅可行性。左為中銀國際副董事長林廣兆。

蔡黃玲玲(左二)同老公蔡金山(右二)拍拖到場,佢表哥戴國興(左一)及表弟戴國強(右一)亦去湊熱鬧。

盧金榮忙爆棄旅行

Albert喺內地投資嘅亞麻紗廠規模係全國最大之一,為保持競爭力,初步研究過埃塞俄比亞嘅投資環境,當地電力至少比內地便宜三分一,人工亦低一大截,加上貨物入口歐美嘅關稅低,所以好吸引。Albert佢喺內地廠房工人約四千人,但係訂單爆棚,所以今次就算去非洲設廠,亦唔使削減內地廠規模喎!

講起做生意,福建幫頭領盧文端兒子盧金榮亦忙到飛起,佢話今個暑假冇打算帶兩個囡囡去旅行,因為近期要周圍飛,負責睇住家族嘅箱包生意,產品包括幫國際名牌生產行李篋。講起揀行李篋心得,佢話首要條件係夠輕身,係咪名牌唔係咁重要。

當日出席嘅名人仲有福建社團聯會主席吳良好、前主席林樹哲等人,福建幫僑領楊孫西嘅兒子楊華勇外父莊哲猛、仁愛堂前主席蔡黃玲玲同老公蔡金山亦拍拖到場。蔡太同菲律賓好有淵源,唔止老公係菲律賓華僑,亦有好多親戚住喺當地,當晚佢表哥都專程由菲律賓來港湊熱鬧。

第一手消息請下載on.cc東網iPhone/iPad/Android/Windows Phone Apps