政壇：搞搞政：林健鋒亂拋金句 一國兩制「史前無例」
經常爆金句嘅行政、立法會議員林健鋒，尋日一爆就打孖嚟，搞到一眾泛民同建制派議員笑到合唔到口，為沉悶嘅立法會政制事務委員會增添唔少生氣。話說喺大家討論緊香港普選係咪要跟國際標準時，林健鋒就發表偉論：「咩叫國際標準？全世界國家都一國一制，『一國兩制』『史前無例』得中國有，要符合國際標準，係咪要我哋恢復一國一制？」嘩，講到「史前」咁遠，石器時代有冇「一國兩制」？真係要搵啲考古學家研究吓。
設計圖片及對白
蔣麗芸（前）一手「充公」咗長毛個鳥籠。
到講提名委員會制度時，林健鋒又要求政改三小組解釋由提委會提名特首普選候選人，係「欽選」定係「競選」？再次引起大家議論紛紛，唔知佢係想講「欽點」、「甄選」，定係將兩者結合再自創一個新詞。委員會主席譚耀宗最後叫大家唔使協助林健鋒處理字眼，即係唔好再嘥時間傾埋呢啲無厘頭嘢。
長毛鳥籠被「充公」
「長毛」梁國雄尋日又拎咗個真鳥籠放喺自己枱面準備喺發言時使用，但Ann蔣麗芸就嫌個鳥籠遮住佢視線，擅自走埋去「充公」咗個鳥籠，聲言開完會先畀番長毛。好少咁樣畀人落面嘅長毛，隨即走向阿Ann搶番鳥籠，然後當場用手打爛埋，原來個鳥籠裏面放咗寫有「普選」字眼嘅字條，寓意要打破鳥籠先有真普選喎！
