相信好多人都會計劃自己嘅退休生活,但有調查就發現,原來都有四成港人考慮唔喺香港退休,比數居然同揀留喺香港退休嘅一樣啊!原來係怕咗香港嘅高樓價。

蕭莉玲二十歲女時已經買落儲蓄保險。

美國萬通亞洲訪問咗五百零八個年齡介乎二十至五十二歲嘅在職人士,除咗有兩成人仲未諗掂去邊退休外,四成唔想喺香港退休嘅受訪者入面,就有一半揀去台灣或者大陸退休。究竟因乜解究令香港咁趕客呢?美國萬通亞洲市務部高級副總裁Jeanne蕭莉玲估計,近年香港樓價同通脹率喺咁升,大家眼見生活指數愈來愈貴,所以先轉移退休陣地。

呢個結果都幾sad,更sad嘅係,香港人對於退休生活真係冇乜信心,十分滿分先得五點五分,叫做勉強合格。當中有百分之六十一受訪者話自己最擔心通脹同失業問題,驚自己太長命嘅都有百分之二十三。其實講到尾,唔敢退休都係全因一個錢字。Jeanne計過條數,如果想喺五十七歲退休,起碼要儲八百萬元先有得傾。

睇嚟後生仔都係早啲儲多個錢傍身,再唔係就學Jeanne咁,二十歲女個時就已經買落儲蓄保險,先追得上通脹啊!

第一手消息請下載on.cc東網iPhone/iPad/Android/Windows Phone Apps