崇尚自然嘅天文台前台長「黑英」林超英尋日喺會展舉行新書發布會,講到可持續發展同資源愈來愈少嘅問題,佢話人類應該要返璞歸真,節約用水用電,先可以減低對地球嘅破壞。佢仲話自己最憎愛迪生發明電燈出嚟,原本人類日出而作日入而息嘅生活習慣徹底改變,搞到佢依家夜晚都要工作喎!

林超英話已唔再相信科學可以解決環保問題。

自細就對天文同科學充滿興趣嘅黑英話,自己已經唔再相信科學可以解決環保問題,反而只會製造更多問題。佢仲話依家好多社會議題,根本係「假問題」,好似郊野公園根本唔會解決到平民嘅住屋需要咁,因地方偏遠、交通唔方便、冇鄰近就業機會,最終只適合興建別墅,對平民住屋情況冇改善。相反應好好規劃一啲本來已經有低層樓宇嘅地方,喺起咗樓嘅地方延伸或加高。

佢仲非常反對機場起第三條跑道,認為不存在跑道飽和嘅問題,純粹係管理不善,賤賣time slot(飛機起降時間),任由航空公司將一班大機拆分成多班細航班引致,而第三條跑道實際運作上會同第二條跑道重疊,故根本改善唔到問題。

第一手消息請下載on.cc東網iPhone/iPad/Android/Windows Phone Apps