沈祖堯發表網誌用足球比喻人生，勉勵學生要搵到自己合適嘅位置。（互聯網圖片）
雖然巴西世界盃結束，但足球熱未減，中文大學校長沈祖堯就發表網誌將足球比喻人生，勉勵學生喺人生「賽事」中，需要遵守一些「規則」先能夠獲取獎牌。佢引用蘇亞雷斯喺球場上犯規嘅例子，比喻人生必須保持誠實同正直，認為球場上許多犯規行為逃過球證眼睛，但上得山多終遇虎，唔好鋌而走險，乘偽行詐，因為信用係人生最寶貴嘅嘢，名譽一旦受損，往往好難補救。
佢喺網誌又提及，要搵到自己位置先能夠成為出色嘅足球員，比賽崗位取決於長處同弱點，放喺唔適當位置嘅人唔止無用武之地，仲可能連累成支球隊，學校、工作、家庭亦如是。團隊運作亦好重要，佢話好欣賞德國隊員湯瑪士梅拿，經常為隊友製造攻擊，但唔會獨攬功勞，寓意人生唔應該一人獨攬所有功勞同光環。
第一手消息請下載on.cc東網
