城中鏡：城城遇威廉哈利相見歡
由英國高級運動品牌舉行嘅皇室慈善馬球盃前日喺英國伯克郡（Berkshire）舉行，天王「城城」郭富城第三年以品牌大使身份亮相，出席嘉賓仲有著名球星奧雲（Michael Owen），一同觀賞馬球賽同參與慈善拍賣，而皇室慈善馬球盃係為連續第三年支持威廉王子嘅慈善機構Tusk Trust同哈利王子的Sentebale而舉辦嘅籌款活動。
威廉王子向城城澄清，太太無再懷孕。
城城同哈利王子唔知傾乜，笑到彎晒腰。
奧雲同城城大談養馬心得。
第二次見威廉王子嘅城城，一見到王子就話：「聽聞你太太又再懷孕了！」威廉王子否認太太凱瑟琳再度懷孕，二人繼續談笑風生，而第三次見面嘅哈利王子同城城亦言談甚歡。
其實，城城一到場即大受歡迎，先有越南歌手Thu Minh上前合照，英國好聲音勝出者Matt Henry同埋當紅模特兒David Gandy亦要同佢拍照留念。城城唔只吸引人，連狗都被佢深深吸引住，纏着他不肯走！被城城吸引住嘅狗名為Bo Derek，城城即同佢嘅「小粉絲」玩遊戲，多次將馬球拋出，乖巧嘅Bo Derek亦將馬球帶回給佢，城城大讚Bo Derek趣致可愛。城城又話同奧雲再遇感到高興，兩位愛馬之人一見面即聊個不停，興高采烈地討論世界盃同養馬心得，奧雲更笑言：「我是用踢足球所賺的錢去完成養馬心願的！」
