城中鏡：油炸鬼艇仔粥擬申遺

繼「港式奶茶」同「蛋撻」入選香港非物質文化遺產後，仁愛堂前主席兼海皇餐飲集團執董蕭楚基，計劃將民間小食「油炸鬼」同廣東粥品「艇仔粥」申遺，冀呢兩款民間特色美食在史上留名。蕭楚基喺上水間粥品店日前開張，一眾善團總理同飲食界好友冒雨撐場，佢就以「油炸鬼」招呼賓客，個個食到舔舔脷。

蕭楚基將入紙申請將「油炸鬼」成為香港非物質文化遺產，將民間小食世代相傳。

黃傑龍（左）同龍昌國際控股主席梁麟（右）都係「艇仔粥」捧場客。

蕭楚基想搞活動壯聲勢

既然要「油炸鬼」同「艇仔粥」申遺，當然要講吓古仔。蕭楚基話相傳油炸鬼係諷刺宋代奸臣秦檜，民間於是製作呢款小食來發洩，時至今日，大人細路都食過油炸鬼。至於「艇仔粥」，最初係由廣州水上人家用艇仔喺荔枝灣河經營販賣，雖然艇仔賣粥已絕迹，但風味至今仍在，值得傳承下去。

蕭楚基話會盡快入紙申遺。為打響聲勢，唔排除搞番個「百人齊造油炸鬼」或「千人齊吃艇仔粥」活動都未定喎。講到製作油炸鬼，佢謙稱唔識，但煲廣東粥就好拿手，「我係潮州人嘛，六、七歲就入廚煲粥畀屋企人食。」講到難忘事，就數蕭媽媽經常煲燶粥，為免浪費，全家焗住照吃。

將油炸鬼申遺，有份剪綵嘅叙福樓集團執董黃傑龍都話好認同，佢話：「呢個係唔少港人嘅集體回憶，不論你係富人定窮人，一定食過油炸鬼。」至於「艇仔粥」，佢認為係體現港人靈活變通、「有乜煮乜」嘅精神。