政壇：KK出新書妻兒齊撐場
立法會議員KK馮檢基尋日喺書展搞新書發布會，佢太太陳敏慈同放暑假返港嘅囝囝馮本一，仲難得現身撐場。KK話今次出書係因為覺得自己由童年開始得到好多唔同人幫助，包括媽媽係爸爸嘅填房，而爸爸喺佢出世三個月後就過咗身，輾轉由正室嘅女兒湊大佢。後來佢入大學時，識咗現時嘅太太，仲傾慕咗足足十八年時間咁耐，雖然多番被拒絕，但最後都抱得美人歸。
馮檢基（中）、太太陳敏慈（右）同囝囝馮本一齊齊喺香港放暑假。
KK嘅囝囝馮本一目前喺英國伯明翰城市大學讀緊舞台設計，趁放暑假返港陪爸爸，加上囝囝得到學校欣賞，喺芸芸大學一年級生嘅作品之中被挑選製作做展覽，似乎讀得唔錯，氹到KK鬼咁開心。馮本一話嚟緊仲有兩年時間學習，希望畢業後可以投身舞台設計行業，仲話估計會留喺中、日、韓等地區發展，因為亞洲地區對舞台設計需求大，但人才培育方面做得較少，會比較吃香喎。
