政壇：公僕斥延長退休計劃假諮詢
立法會公務員及資助機構員工事務委員會今日舉行公聽會，聽取公務員工會同關注團體就延長公務員退休年齡嘅意見，而第一標準薪級員工總會四、五十人尋日由金鐘港鐵站遊行至政府總部，抗議未能受惠於延長退休計劃，加上要由上級批准，擔心會產生「馬房文化」。
鄧國威派定心丸，話當局會有公開同公平嘅程序處理延長退休嘅申請。（資料圖片）
有公務員團體到政府總部請願，抗議未能受惠於延長退休計劃。
總會代表話諮詢文件提到要符合聘請有困難同工作有連續性兩個條件，先可以考慮延長退休年齡，而總會員工主要係從事清潔、雜項等工作，難以符合要求，批評政府「假諮詢」，強調唔想被政府利用「過橋」，為高層官員延長退休鋪路。
公務員事務局局長鄧國威即刻否認今次係「假諮詢」，仲話明白部分公務員擔心建議延長退休年齡嘅措施，會出現「馬房文化」影響晉升。佢仲大派定心丸，強調當局會有公開、公平程序處理喎。
眼見受到立法會拉布戰影響，多項政策建議都要押後到十月新立法年度先開波再審議，鄧國威都加把口，話希望議員喺立法會復會後，可以盡快審議通過公務員加薪建議。
