有示威者喺上周日嘅《城市論壇》企上枱,情況一度混亂,逼到港台要諗計加強保安。尋日《城市論壇》繼續出現混亂場面,但搗亂者唔係台下嘅示威人士,而係因為台上三位嘉賓大玩聲疊聲。建制派立法會議員Ann蔣麗芸先係批評真普選聯盟召集人鄭宇碩手持外國護照「唔係香港人」,之後就質疑學民思潮召集人黃之鋒「唔夠秤」,鄭、黃二人同時反擊,搞到其他人都唔係好聽到佢哋講緊乜。

設計圖片及對白

城市論壇設三呎高膠板

黃之鋒同鄭宇碩批評政改諮詢報告貶低市民對公民提名同真普選嘅訴求,認為中央應該要釋出善意,唔好提出有篩選嘅方案。阿Ann就認為報告公平公正,包羅普遍市民嘅意見,又話唔少人參加佔中公投,代表市民渴望有普選,呼籲泛民唔好臨門一腳先嚟搞破壞。

呢個時候,黃之鋒就指摘阿Ann,話佢參選立法會嗰陣,都係要攞到一百個本港永久性居民提名先可入閘,認為既然佢當初係透過公民提名成為立法會議員,咁點解依家又唔支持公民提名呢?阿Ann反駁話「公民」同「永久性居民」嘅定義唔一樣,又話自己支持「永久性居民提名」,但就唔支持「公民提名」喎!

不過,當主持謝志峰問阿Ann係咪支持永久性居民提名特首候選人時,阿Ann冇正面回應,繼而轉移話題質疑謝志峰點解邀請鄭宇碩及黃之鋒出席論壇:「我哋想講香港前途問題,有個外國人(被指擁有外國護照的鄭宇碩),仲有個唔夠秤嘅小朋友(黃之鋒)喺度,咁點討論呢?你有冇請過泛民議員呢?」謝反駁話:「你咪係立法會議員囉!我今次冇請(泛民)議員!」總之全場拗到面紅耳熱,聲疊聲混亂不堪。

《城市論壇》尋日實施臨時保安措施,所有入場人士都要登記身份證頭四個號碼,隨身行李要經過檢查,並要簽署遵守節目規矩嘅承諾書。大會亦安排二十幾名便衣同制服保安維持場地秩序,並最少要求三位行為滋擾嘅觀眾離場。另外,港台正在製造一個約三呎高嘅透明膠板,用作隔開講台及觀眾席,預計今個星期日可以派上用場。

第一手消息請下載on.cc東網iPhone/iPad/Android/Windows Phone Apps