一家人開會議事，父親甫開口，「主流意見認為……」「等等！」大兒子插嘴，「我同細佬都有同一立場，老竇你就堅持己見，二對一，點睇我哋都係多數，點解你會係主流？」父親冷眼道︰「我係一家之主，我嘅意見咪係『主流意見』囉，雖然你哋係多數，但我會用『不少』嚟形容，多數同不少都無衝突吖！」

「主流？下流就有你份，咁你之前諮詢嚟做咩？」小兒子愈講愈不忿。父親不屑，「咁都仲要問？諮詢咪係『姿態式詢問』，幫你哋反映吓就算。」「啪」一聲，大兒子怒而拍枱，「依家屋企由你一個男子話晒事咩？擺明就以大欺小！」父親笑謂︰「千祈唔好咁講，我假假哋都係『主流』，最多都係『以主欺次』啫！」

父親打橫嚟講，兩位兒子忍無可忍，決定請示阿爺，「阿爺，你又點睇？」大兒子問。

「唔使嘈喇，原地踏步咪最好囉！」阿爺一錘定音……

第一手消息請下載on.cc東網iPhone/iPad/Android/Windows Phone Apps